“Korrupsiyaya qarşı mübarizə haqqında” Azərbaycan Respublikasının qanunu var ki, bu Qanuna da korrupsiya ilə əlaqədar hüquqpozmalarının aşkar edilməsi və qarşısının alınması, sosial ədalətin müdafiə olunmasına, dövlət orqanlarının və yerli özünüidarəetmə orqanlarını, vəzifəli şəxslərin dövlət orqanlarının və yerli özünüidarəetmə orqanlarının, vəzifəli şəxslərin fəaliyyətinin qanuniliyinin, şəffaflığının və səmərəliliyinin təmin edilməsinə yönəlmişdir.
Buna qarşı mübarizə istiqamətində 1 il ərzində atılan addımlarla bağlı Korrupsiyaya qarşı Mübarizə Fondunun icraçı direktoru Vasif Mövsümovla əlaqə saxladıq.
Korrupsiya qarşı mübarizə ilə bağlı 2004-cü ildən müəyyən addımlar atıldığını söyləyən icraçı direktoru yeni proqramların fəaliyyət göstərməsini, Azərbaycanın korrupsiya ilə bağlı beynəlxalq konvensiyalara qoşulması və s. tədbirləri, ümumiyyətlə, bu istiqamətdə atılan addımları korrupsiya qarşı mübarizə aparmaq üçün şəraitin yaradılması ilə əlaqələndirdi: "Bu şərait qanunların qəbulu, hansısa mübarizə aparan orqanların yaradılması istiqamətində atılan addımları hətta beynəlxalq təşkilatlar da müsbət addımlar hesab edirlər. Lakin ictimai rəylərdə korrupsiyaya qarşı mübarizənin hələ də ürəkaçan bir səviyyədə olmadığına görə narazılıqlar var. Vətəndaşların şikayətlərində də bu özünü göstərir. 2011-ci ilin əvvəlinə qədər, durğunluq var idi. Lakin ötən ilin əvvəllərindən başlayaraq dövlət başçısının növbəti dəfə atdığı müsbət addımlar öz effektini göstərməyə başladı".
Son bir ili ötən illərlə müqayisə edən həmsöhbətimiz, müsbət halların artdığını vurğuladı: "Bizim 1 ildə böyük dəyişikliklər edə biləcəyimizi də düşünmək sadəlövhlük olardı. Buna baxmayaraq, çox şeyə nail ola bilərdik. Məsələn, vətəndaşlarla tez-tez ünsiyyətdə olan dövlət orqanlarında rüşvətin qarşısının alınması və s. Amma bununla ilə bağlı bir çox müsbət məqamlar da görürük. Vətəndaşların ərizə və şikayətlərinə baxılması məsələlərində də müsbət məqamlar hardasa özünü göstərir. Lakin bu da kifayət deyil. Bu, bizim gözlədiyimizdən də az oldu. Mənfi hallar hələ də qalmaqdadır. Bu da vətəndaşların inamsızlığına gətirib çıxarır. Belə bir statistikanı nəzərinizə çatdırım ki, ötən ilin birinci yarımilində fonda daxil olan şikayət ərizələrinin sayı daha çox idi, nəinki həmin ilin ikinci yarımilində. Azərbaycanda korrupsiyaya qarşı mübarizə başlayarkən “qaynar xətt” yaradılmışdı - 161 xidməti. Lakin bu kifayət deyildi ki, vətəndaşlar öz şikayətlərini etsin. Onlar məmurun özbaşınalığından, sahibkar onun fəaliyyəti ilə bağlı olan qeyri-qanuni müdaxilələrlə bağlı şikayətləri hara etməli olduqlarını bilmirdilər. “Qaynar xətt” yalnız rüşvətlə bağlı problemlərin şikayəti üçündür. Amma digər məsələlərlə bağlı vətəndaş sikayət etməyə yer tapa bilmir. Ən böyük problemlərdən biri də budur".
Vasif Mövsümov həmçinin əlavə etdi ki, bir sıra şəxslər rüşvətə şərait yaratdıqları üçün günah onların özlərindədir: "Bəzi vətəndaşlar var ki, onlardan heç kəs pul tələb etmədiyi halda, özləri pul təklif edirlər. Bu da vətəndaşın laqeydliyidir. Dövlət orqanları ilə yanaşı, vətəndaş da öz borcunu yerinə yetirməlidir".