Ana Vətən Partiyasının sədri, deputat Fəzail Ağamalı dedi ki, prezidentin tapşırığından sonra korrupsiyaya ilə mübarizənin daha da intensivləşdirilməsi üçün konkret addımlar atılıb: “Mübarizə iki istiqamətdə getdi. Birincisi, korrupsiya və rüşvətxorluğu doğuran sosial-iqtisadi amillərin aradan qaldırılması üçün işlər görüldü. Bu bir ildə prezidentin sərəncamları, Milli Məclisin qanunlara etdiyi əlavə və dəyişikliklərlə ayrı-ayrı sahələrdə çalışanların sosial vəziyyətinin yaxşılaşdırıldı, onların maaşı artırıldı. Bəzi güc strukturlarında çalışanlar üçün vətəndaşlardan alınan cərimələrin 25 faizinin onların əməkhaqqına əlavə edilməsi qərarı verildi. Sosial müdafiənin gücləndirilməsi daha çox korrupsiya üçün münbit şərait olan sahələrdə tətbiq edildi. Korrupsiya və rüşvətxorluğun qarşısının alınması üçün inzibati yollardan da istifadə edildi. Ayrı-ayrı şəxslər haqqında cinayət işi qaldırıldı, o şəxslər cəzalarını aldı”.
F.Ağamalı maraqlı bir fikir də söylədi: “Səmimi deyim, korrupsiya və rüşvətxorluq elə sosial bəladır ki, bir qərarla, bir addımla və bir ildə bunun kökünü kəsmək, mübarizəni bu müddətdə tamamilə həyata keçirib qurtarmaq mümkün deyil. Bunun üçün sistemli mübarizə aparmaq gərəkdir. Ayrı-ayrı hüquqşünas və iqtisadçıların bu bir ildə korrupsiya ilə mübarizə sahəsində heç bir nəticə əldə edilməməsini deməsi həqiqət bucağından yanaşma deyil. Korrupsiya ilə mübarizə elə məsələ deyil ki, bu bəlaya yoluxmuş ayrı-ayrı qurumların başında duran şəxslərin, onun əməkdaşlarının hamısını avtobusa, qatara doldurub aparıb Qobustan həbsxanasına salasan, bununla da iş bitə. Bunun üçün cəmiyyətin özü sağlamlaşmalıdır. Rüşvət verən verməli, alan almalı deyil. Bu əməlləri gündəlik fəaliyyətində iş prinsipinə çevirənlərin ictimai şüur səviyyəsi yüksəlməlidir. Onun düşüncəsi o səviyyəyə yetişməlidir ki, bununla məşğul olmağın cəmiyyəti məhv etdiyini anlasın. Korrupsiya bəşəriyyətin bəlasıdır. Elə ölkə yoxdur ki, orada bu problem yaşanmasın. Bu gün nümunə gətirəcəyimiz ən demokratik ölkələrdə də müəyyən qədər korrupsiya var. Azərbaycan kimi ölkələrdə bu daha primitiv olduğu üçün korrupsiyanın ən demokratik ölkələrdəki kimi epizodik halda baş verməsi mümkün olmur. Ancaq işin müsbət tərəfi odur ki, bu bəla ilə mübarizə davam edir. Bu, böyük prosesdir, bunun əvvəli var, davam edir, axırının nə vaxt olacağı bəlli deyil. Çünki insan, onun tamahı, hadisələrə subyektiv münasibəti durduqca bu kimi xoşagəlməz hallar olacaq”.